ಪುಟಾಣಿ ಪ್ರೇಮ

Posted: ಸೆಪ್ಟೆಂಬರ್ 5, 2011 in ವಿಷಯ ವಿಶೇಷ

ಪ್ರೇಮ ಹುಟ್ಟೋದಕ್ಕೆ ಹೊತ್ತು ಗೊತ್ತು ಹೇಗೂ ಇಲ್ಲ. ಪ್ರಾಯದ ಮಿತಿಯೂ ಇಲ್ಲ ಅಂದ್ರೆ ನಂಬ್ತೀರಾ? ಹೌದು, ನಮ್ಮ ಅಕ್ಕಪಕ್ಕದಲ್ಲೇ ಆಟವಾಡೋ ಹತ್ತರ ಹರೆಯದ ಪುಟಾಣಿಗಳೂ ಲವ್ವಿಗೆ ಬೀಳಬಹುದು. ಅರೆರೆ, ಅಷ್ಟು ಚಿಕ್ಕ ವಯಸ್ಸಿನಲ್ಲಾ? ಡೋಂಟ್ ವರಿ. ಅದು ರೊಮ್ಯಾಂಟಿಕ್ ಲವ್ ಏನಲ್ಲ, ಬರಿಯ ಟೆಂಪರರಿ ಪ್ರೀತಿ ಅಷ್ಟೇ.

ಅಮ್ಮಾ, ನಮ್ ಮಿಸ್ ಎಷ್ಟು ಒಳ್ಳೆಯವ್ರು ಗೊತ್ತಾ..? ಎಷ್ಟು ಚೆನ್ನಾಗಿ ಪಾಠ ಹೇಳ್ಕೊಡ್ತಾರೆ…
-ನಾಲ್ಕನೇ ತರಗತಿಯಲ್ಲಿರೋ ಮಗ ಹೀಗೆ ದಿನವೂ ಟೀಚರಮ್ಮನನ್ನು ಸ್ತುತಿಸುವುದು ಅಮ್ಮನಿಗೇನೂ ಹೊಸದಲ್ಲ. ತನ್ನ ಮಿಸ್ ಹಾಗೆ ಮಾಡಿದ್ರು, ಹೀಗೆ ಮಾಡಿದ್ರು ಅನ್ನುತ್ತಾ ದಿನಕ್ಕೊಂದು ಟೀಚರ್ ಕಥೆ ಹೇಳುವ ಪುಟ್ಟ ಒಂದು ದಿನವಂತೂ ‘ಅಮ್ಮಾ, ನಾನು ನಮ್ ಕರುಣಾ ಮಿಸ್‌ನೇ ಮದ್ವೆ ಆಗೋದು’ ಅನ್ನಬೇಕಾ!? ಅಮ್ಮನಿಗೆ ನಗು. ಪುಟ್ಟನ ಅಪ್ಪ, ಅಮ್ಮನಿಗೆ, ನೆರೆಮನೆಯ ಸಂಗೀತಾ ಆಂಟಿಗೆ ಎಲ್ಲರಿಗೂ ಅವನ ಈ ಟೀಚರ್ ಪ್ರೇಮ ನಗಲೊಂದು ವಿಷಯ.
ಇಷ್ಟು ಸಣ್ಣ ಹುಡುಗನಿಗೇಕೆ ಮದುವೆ ವಿಚಾರ ತಲೆಯಲ್ಲಿ ಹೊಳೆಯಿತು? ಅದೂ ತನಗಿಂತ ಅಷ್ಟೊಂದು ದೊಡ್ಡವರಾದ ಟೀಚರನ್ನೇ ಮದ್ವೆ ಆಗ್ತೇನೆ ಅಂದುದ್ಯಾಕೆ ಎಂದೆಲ್ಲ ಅವರು ಆಲೋಚಿಸುವುದಕ್ಕೆ ಹೋಗಿರಲಾರರು. ನಿಜ, ಎಂಟೊಂಭತ್ತು ವರ್ಷದ ಆ ಪುಟ್ಟ ಹುಡುಗನೂ ಲವ್ ಮಾಡ್ತಾನೆ ಅನ್ನೋ ಸಂಶಯ ಮೂಡೋದಾದ್ರೂ ಕಷ್ಟವೇ. ಆ ವಯಸ್ಸಿನಲ್ಲೂ  ಅವನಲ್ಲಿ ಪ್ರೇಮದ ಭಾವನೆ ಹುಟ್ಟುವುದಕ್ಕೆ ಸಾಧ್ಯವಾ? ಇನ್ನೂ ‘ಲವ್’ ಅನ್ನೋ ಪದವನ್ನು ಟಿವಿಯಲ್ಲಿ ಕೇಳಿ, ನೋಡಿ ಗೊತ್ತಿರುವ ಹುಡುಗನಿಗೆ ಟೀಚರಮ್ಮನ ಮೇಲೆ ಉಂಟಾದದ್ದು  ನಿಜಕ್ಕೂ ಪ್ರೇಮವಾ?
‘ಅಲ್ಲ’ ಅನ್ನುತ್ತದೆ ಮನಃಶಾಸ್ತ್ರ, ಅದರ ಪ್ರಕಾರ ಇದು ‘ಪಪ್ಪಿ ಲವ್’.
ಎಳೆಯರ ಪ್ರೇಮ
ಇನ್ನೇನು ಹದಿಹರೆಯಕ್ಕೆ ಕಾಲಿಡುತ್ತಿದ್ದಾರೆ ಎನ್ನುವಾಗ ಅಥವಾ ಅದಕ್ಕಿಂತಲೂ ಮೊದಲೇ ಎಂಟರಿಂದ ಹತ್ತು ವರ್ಷದ ಪ್ರಾಯದಲ್ಲೇ ಎಳೆಯ ಮಕ್ಕಳಲ್ಲಿ ಕಾಣಿಸಿಕೊಳ್ಳುವ ಭಾವನೆ ಇದು. ಹುಡುಗನೊಬ್ಬನಿಗೆ ತನ್ನದೇ ವಯಸ್ಸಿನ ಹುಡುಗಿಯ ಮೇಲೆ ಸುಖಾಸುಮ್ಮನೇ ಪ್ರೀತಿ ಹುಟ್ಟಬಹುದು, ಟೀಚರ್ ಮೇಲೂ ಅಟ್ಯಾಚ್‌ಮೆಂಟ್ ಕಾಣಿಸಿಕೊಳ್ಳಬಹುದು. ಹತ್ತರ ಹರೆಯದ ಹುಡುಗಿಯೂ ತನಗಿಂತ ಕೊಂಚ ದೊಡ್ಡ ಹುಡುಗನೊಬ್ಬನ ಮೇಲೋ ಅಥವಾ ತನ್ನದೇ ಕ್ಲಾಸಿನ ಗೆಳೆಯನ ಮೇಲೆ ಪ್ರೇಮಕ್ಕೆ ಬಿದ್ದುಬಿಡಬಹುದು. ಆದರೆ ಈ ಪ್ರೇಮ ಗಂಭೀರ ಪ್ರೇಮವಲ್ಲ. ಮನೆಯಲ್ಲಿರುವ ನಾಯಿಮರಿಯೊಂದು ಮುದ್ದಿನಿಂದ ಕರೆದಾಗ ನಮ್ಮ ಕಾಲನ್ನೇ ಪ್ರೀತಿಯಿಂದ ನೆಕ್ಕಿ ಮುದ್ದಿಸುತ್ತದಲ್ಲ, ಹಾಗೆಯೇ ಇದು. ತನ್ನನ್ನು ಆದರಿಸುವವರ, ಪ್ರೀತಿಯಿಂದ ಕಾಣುವವರ ಮೇಲೆ ಒಲವು ವ್ಯಕ್ತಪಡಿಸುವ ರೀತಿ ಇದು.
ಇದಕ್ಕೆ ‘ಕಾಫ್ ಲವ್’ ಅಥವಾ ‘ಕಿಟನ್ ಲವ್’ ಎಂಬ ಹೆಸರೂ ಇದೆ. ಎಳೆಗರು ತನ್ನಮ್ಮನನ್ನು ಪ್ರೀತಿಯಿಂದ ನೆಕ್ಕುತ್ತದಲ್ಲ ಹಾಗೆ ಈ ಎಳೆಮಕ್ಕಳ ಪ್ರೀತಿಯೂ ಅಬೋಧ. ಬೆಕ್ಕುಗಳು ಒಂದಕ್ಕೊಂದು ನೆಕ್ಕುತ್ತಾ ಮುದ್ದು ಮಾಡುತ್ತವಲ್ಲ, ಹಾಗೇ ಈ ಪುಟಾಣಿಗಳ ಪ್ರೀತಿಯೂ ನಿಷ್ಕಲ್ಮಷ. ಅಲ್ಲಿ ದೈಹಿಕ ವಾಂಛೆ ಏನೂ ಇರದು. ತನಗಿಷ್ಟವಾದ ಜೀವ ತನ್ನ ಜೊತೆಗಿರಲಿ ಎಂಬ ಹಂಬಲ ಕಾಣಿಸಬಹುದು ಅಷ್ಟೆ.
ಸಕಲರ ಅನುಭವ
ಅಲ್ಲೊಬ್ಬ ಇಲ್ಲೊಬ್ಬರೆಂದಲ್ಲ, ಬಹುತೇಕ ಎಲ್ಲರೂ ಈ ‘ಪಪ್ಪಿ ಲವ್’ ಹಂತವನ್ನು ಅನುಭವಿಸಿಯೇ ದಾಟಿ ಬರುತ್ತಾರೆ ಅನ್ನುತ್ತಾರೆ ಮನಃಶಾಸ್ತ್ರಜ್ಞರು. ಇದು ರೊಮ್ಯಾಂಟಿಕ್ ಲವ್‌ನಷ್ಟು ತೀವ್ರವಲ್ಲ. ಅನೇಕರಲ್ಲಿ ಇತರರ ಬಗೆಗೆ ಇದೊಂದು ಆದರ, ಅಭಿಮಾನವಾಗಿ ಉಳಿಯಬಹುದು. ಇನ್ನು ಕೆಲವರು ಪ್ರೀತಿ, ಪ್ರೇಮ ಎಂದು ವ್ಯಕ್ತಪಡಿಸಲೂಬಹುದು. ಎಳೆಯದರಲ್ಲೇ ಸಿನಿಮಾದಂತಹ ಮಾಧ್ಯಮಗಳಲ್ಲಿ ಪ್ರೇಮ ವ್ಯಕ್ತಪಡಿಸುವಿಕೆಯ ವಿಧಾನಗಳನ್ನು ಕಂಡು ಪರಿಚಯವಿರುವವರು ಅದನ್ನೂ ಅನುಕರಿಸಬಹುದು. ಕೆಲವು ಚಲನಚಿತ್ರಗಳಲ್ಲಿ ಈ ಪಪ್ಪಿ ಲವ್ ಸಮಸ್ಯೆ ಚಿತ್ರಿತವಾದದ್ದುಂಟು. ‘ಮೇರಾ ನಾಮ್ ಜೋಕರ್’ ಚಿತ್ರದಲ್ಲಿ ನಾಯಕ ರಾಜು ತನ್ನ ಹದಿಹರೆಯದಲ್ಲಿ ತನ್ನ ಟೀಚರ್ ಮೇರಿಯನ್ನೇ ಪ್ರೀತಿಸುತ್ತಾನೆ.
ಈ ಪಪ್ಪಿ ಲವ್ ಹುಟ್ಟಿಕೊಳ್ಳಲು ತನ್ನ ಟೀಚರ್ರೇ ಆಗಬೇಕೆಂದಿಲ್ಲ. ದಿನವೂ ಸಿಗುವ ಫ್ಯಾಮಿಲಿ ಫ್ರೆಂಡ್, ಸದಾ ಮುದ್ದು ಮಾಡೋ ಆಂಟಿ, ಅಂಕಲ್, ಫ್ಯಾಮಿಲಿ ಫ್ರೆಂಡ್, ತನ್ನ ಅಭಿಮಾನದ ನಟ ಅಥವಾ ನಟಿ… ಹೀಗೆ ಮನಸ್ಸು ಮೆಚ್ಚಿಕೊಂಡ ಯಾರ ಮೇಲಾದರೂ ಈ ಪ್ರೀತಿ ಹುಟ್ಟಬಹುದು. ತಾನು ಮೆಚ್ಚಿದ ಆ ವ್ಯಕ್ತಿಯ ದಿನಚರಿ, ನಡೆ-ನುಡಿಗಳನ್ನೆಲ್ಲ ಗಮನಿಸುವುದು, ಅವರಿಗೆ ಗಿಫ್ಟ್ ಕೊಡುವುದು, ಅವರ ಬಗ್ಗೆ ತನ್ನದೇ ರೀತಿಯಲ್ಲಿ ಕನಸು ಹೆಣೆದುಕೊಳ್ಳುವುದನ್ನೆಲ್ಲ ಮಾಡಬಹುದು. ಮಾದರಿಗಳನ್ನು ಕಂಡುಕೊಳ್ಳುವ ವಯಸ್ಸೂ ಇದಾಗಿರುವುದರಿಂದ ತಮ್ಮ ಮೆಚ್ಚಿನ ವ್ಯಕ್ತಿಯ ಅಭ್ಯಾಸ, ಹವ್ಯಾಸಗಳನ್ನು ತಾನೂ ಬೆಳೆಸಿಕೊಳ್ಳುವ ಪ್ರಯತ್ನವನ್ನೂ ಕಾಣಬಹುದು. ಚೆನ್ನಾಗಿ ಓದಬೇಕೆನ್ನುವ ಅಭಿಲಾಷೆಯುಳ್ಳ ಹುಡುಗಿಗೆ ಪಕ್ಕದ ಮನೆಯ ಓದಿನಲ್ಲಿ ಮುಂದಿರುವ ಹುಡುಗನ ಮೇಲೆ ಅಭಿಮಾನ ಹುಟ್ಟಿ ಅವನನ್ನೇ ಗಮನಿಸಬಹುದು, ಅವನ ದಿನಚರಿಗಳನ್ನೆಲ್ಲ ತಾನೂ ಅಳವಡಿಸಿಕೊಳ್ಳಬಹುದು. ಕ್ರಮೇಣ ಆಕೆ ತನ್ನದೇ ದಿನಚರಿ, ಓದುವ ರೀತಿಗಳನ್ನು ರೂಢಿಸಿಕೊಂಡಂತೆ ಆ ಹುಡುಗನನ್ನು ಗಮನಿಸುವ ಅಭ್ಯಾಸ ಬಿಟ್ಟೇ ಹೋಗಬಹುದು. ಹೀಗೆ ಅಭಿಮಾನಪೂರ್ವಕವಾಗಿ ಪ್ರೀತಿ ಹುಟ್ಟಿಕೊಳ್ಳಲು ಹೆಚ್ಚು ಸಮಯ ಬೇಡ, ಅದು ಬಹುಕಾಲ ಬಾಳುವುದೂ ಇಲ್ಲ.
ರಿಸ್ಕಿ ಅಲ್ಲ
‘ನಾನು ಕರುಣಾ ಮಿಸ್‌ನ ಮದ್ವೆ ಆಗ್ತೀನಿ’ ಅಂತ ಮೇಲೆ ಪುಟ್ಟ ನೊಬ್ಬ ಹೇಳಿದ ಹಾಗೇ ನಮ್ಮ ಮನೆಯ ಪುಟ್ಟನೋ ಪುಟ್ಟಿಯೋ ಹೇಳಿದಾಕ್ಷಣ ಇದೆಂಥದಪ್ಪಾ ಈ ಪ್ರಾಯದಲ್ಲೇ ಲವ್ವು, ಮದುವೆ ಅಂತಾರಲ್ಲ ಮಕ್ಕಳು ಅಂತ ಹೆತ್ತವರು ಚಿಂತೆಗೆ ಬೀಳೋದೇನೂ ಬೇಡ. ‘ಇಂಥ ಪ್ರೇಮಗಳು ಅಂಥಾ ಗಂಭೀರವೇನಲ್ಲ. ಆ ಹಂತದಲ್ಲಿ ಮನಸ್ಸಿನಲ್ಲಿ ಮೂಡುವ ಇನ್‌ಫ್ಯಾಚುವೇಶನ್ ಅಷ್ಟೇ ಇದು. ಆ ಒಂದು ಹಂತವನ್ನು ದಾಟಿದಾಗ ಅದು ಕ್ರಮೇಣ ಮರೆಯಾಗುತ್ತದೆ. ಈ ರೀತಿಯ ಪ್ರೀತಿಯಲ್ಲಿ ಸಿಲುಕಿದ ಮಕ್ಕಳಿಗೆ ಚಿಕಿತ್ಸೆಯೂ ಬೇಕಾಗುವುದಿಲ್ಲ. ಹೆಚ್ಚೆಂದರೆ ಕೌನ್ಸೆಲಿಂಗ್ ಮಾಡಿದರೆ ಸಾಕಾಗುತ್ತದೆ’ ಅಂತಾರೆ ಮನಃಶಾಸ್ತ್ರಜ್ಞೆ ಡಾ|ಲತಾ.
ಆದರೂ ಈ ಪ್ರೀತಿಯ ಸೆಳೆತಕ್ಕೆ ಬಿದ್ದವರಿಗೆ ಏಕಾಗ್ರತೆಯ ಕೊರತೆ ಆಗಬಹುದು. ಕೆಲವೊಮ್ಮೆ ತಾವೂ ದೊಡ್ಡವರಂತೆಯೇ ಪ್ರೇಮಪತ್ರಗಳನ್ನು ಕೊಡುವಂತಹ ಸಾಹಸಕ್ಕೂ ಇಳಿದು ತಮ್ಮ ಪರಿಸರದಲ್ಲೇ ಗಾಸಿಪ್ ಹುಟ್ಟಿಕೊಳ್ಳುವುದಕ್ಕೂ ಕಾರಣವಾಗಬಹುದು. ತಾನು ಪ್ರೀತಿಸುವ ಹುಡುಗನ ಬಗೆಗೆ ಡೈರಿಯಲ್ಲಿ ಬರೆದಿಟ್ಟುದನ್ನು ಅಮ್ಮ ಓದಿದಳೆಂಬ ಕಾರಣಕ್ಕೇ ಹತ್ತರ ಹರೆಯದ ಹುಡುಗಿಯೊಬ್ಬಳು ಆತ್ಮಹತ್ಯೆ ಮಾಡಿಕೊಂಡ ಘಟನೆಯೂ ಬೆಂಗಳೂರಿನಲ್ಲಿ ನಡೆದಿದೆ.
ಮಕ್ಕಳಲ್ಲಿ ಪಪ್ಪಿ ಲವ್ ಶುರುವಾಯಿತೆಂದಾಕ್ಷಣ ಹೆತ್ತವರ ಗಮನಕ್ಕೆ ಅದು ಬಂದೇ ಬರುತ್ತದೆ. ಅದನ್ನು ನಕ್ಕು ಆನಂದಿಸುವ ಹಾಗೆಯೇ ಒಳಗೊಳಗೇ ಮಕ್ಕಳ ಮೇಲೆ ಕೊಂಚ ನಿಗಾ ಇಡಬೇಕಾದ್ದೂ ಹೆತ್ತವರ ಕರ್ತವ್ಯ. ಹೀಗಾದರೆ ಮಕ್ಕಳು ಈ ಆರಂಭಿಕ ಹಂತದ ‘ಕ್ರಶ್’ ಅನ್ನೇ ಪ್ರೇಮವೆಂದು ಗಂಭೀರವಾಗಿ ಪರಿಗಣಿಸುವುದನ್ನು ತಪ್ಪಿಸಬಹುದು. ಕೆಲವೊಮ್ಮೆ ಈ ಪ್ರೀತಿ ಮುರಿದು ಹೋದಂತೆನಿಸಿದಾಗ ಮಕ್ಕಳು ಕುಗ್ಗಿ ಹೋಗುವ ಸಂದರ್ಭದಲ್ಲೂ ಹೆತ್ತವರ ಕಾಳಜಿ ಅವರಿಗೆ ಬೇಕು. ಆದರೆ, ಹೀಗೆ ಹಳಿ ತಪ್ಪುವ ಪ್ರಕರಣಗಳು ಬಹು ಕಡಿಮೆ.
ಪಪ್ಪಿ ಲವ್ ಯಾವ ಸ್ವರೂಪದಲ್ಲೇ ಇರಲಿ, ಅದು ಮಗುವಿಗೊಂದು ವಿಶೇಷ ಆತ್ಮವಿಶ್ವಾಸವನ್ನು ನೀಡುವುದು ಸುಳ್ಳಲ್ಲ. ಮೊತ್ತಮೊದಲ ಬಾರಿಗೆ ತನ್ನ ಮನೆಯಿಂದ ಹೊರತಾದವರೊಬ್ಬರನ್ನು ಅದು ಪ್ರೀತಿಸಿರುತ್ತದೆ. ಹಾಗೆಂದು, ಈ ಪ್ರೀತಿಯನ್ನೇ ಕೊನೆತನಕ ಉಳಿಸಿಕೊಳ್ಳುತ್ತೇನೆ ಅನ್ನುವುದು ಮಾತ್ರ ಮೂರ್ಖತನ. ಇಂತಹ ಮೂರ್ಖತನಕ್ಕೆ ಯಾರೂ ಇಳಿಯುವುದೂ ಇಲ್ಲ. ಈ ಎಳೆಯ ಪ್ರೇಮದ ಮಾಯೆಯೇ ಹಾಗೆ, ಗೊತ್ತಾಗದಂತೆ ಬರುತ್ತದೆ, ಸದ್ದಿಲ್ಲದೇ ಹೊರಟು ಹೋಗಿಬಿಡುತ್ತದೆ.
—–

ಮಕ್ಕಳಲ್ಲಿ ಹದಿಹರೆಯದ ಹಂತದಲ್ಲಾಗುವ ಯಾವುದೋ ಹಾರ್ಮೋನ್ ಬದಲಾವಣೆಯಿಂದ ಇದು ಬರುವುದಿರಬೇಕು. ಹೆಚ್ಚಾಗಿ ಮನೆಯಿಂದ ಹೊರತಾದ ಪರಿಸರದಲ್ಲಿ ಎಲ್ಲರೂ ಮಕ್ಕಳನ್ನು ಆದರಿಸುವುದಿಲ್ಲ. ಇಂಥಲ್ಲಿ ಅವರನ್ನು ವಿಶೇಷವಾಗಿ ಯಾರೋ ಆತ್ಮೀಯತೆಯಿಂದ ಕಂಡು ಪ್ರೀತಿ ನೀಡಿದಾಗ ಮಕ್ಕಳಲ್ಲಿಯೂ ಒಂದು ಅಟ್ಯಾಚ್‌ಮೆಂಟ್ ಬೆಳೆಯುತ್ತದೆ. ಇದನ್ನೇ ‘ಪಪ್ಪಿ ಲವ್’ ಅನ್ನಬಹುದು. ಓದಿನಲ್ಲಿ ಏಕಾಗ್ರತೆ ನಷ್ಟವಾಗೋದು, ತುಂಬಾ ಚೆಂದವಾಗಿ ತಮ್ಮನ್ನು ಸಿಂಗರಿಸಿಕೊಳ್ಳೋದು ಇಂತಹುದರಲ್ಲೂ ಅವರ ‘ಪಪ್ಪಿ ಲವ್’ ಪ್ರಭಾವ ಕಾಣಿಸಿಕೊಳ್ಳಬಹುದು. ಆದರೆ, ಇದು ಶಾಶ್ವತವಾಗಿ ಉಳಿಯುವುದಿಲ್ಲ. ಇದೊಂದು ಪಾಸಿಂಗ್ ಸ್ಟೇಜ್ ಅಷ್ಟೇ.
ಡಾ. ಕೆ.ಎಸ್. ಲತಾ, ಮನಃಶಾಸ್ತ್ರಜ್ಞೆ, ಕೆಎಂಸಿ, ಮಣಿಪಾಲ.

ನಿಮ್ಮದೊಂದು ಉತ್ತರ

Fill in your details below or click an icon to log in:

WordPress.com Logo

You are commenting using your WordPress.com account. Log Out /  ಬದಲಿಸಿ )

Twitter picture

You are commenting using your Twitter account. Log Out /  ಬದಲಿಸಿ )

Facebook photo

You are commenting using your Facebook account. Log Out /  ಬದಲಿಸಿ )

Connecting to %s