ಯಾಕೋ ಲೈಫು ಬೋರು. ಮಕ್ಕಳಿಗೆ ಮಾಡೋ ಕರ್ತವ್ಯ ಮಾಡಿ ಆಗಿದೆ. ದುಡಿದೂ ದುಡಿದೂ ಸಾಕಾಗಿದೆ. ಎಲ್ಲೋ ಏಕಾಂಗಿ ಭಾವ. ಮನೆಯಲ್ಲಿ ಅವಳನ್ನು ಕಂಡರೂ ಅಂಥಾ ಸೆಳೆತವಿಲ್ಲ.. ಬದುಕಿನಲ್ಲಿ ಗೆದ್ದೆ ಅಂದುಕೊಂಡವರಿಗೂ ಮುಂದೆಲ್ಲಾ ಖಾಲಿ ಖಾಲಿ. ಏನಪ್ಪಾ ಮಾಡೋದು? ಮನಸ್ಸು ಗೊಂದಲದಲ್ಲಿದೆ. ಹೊಸತರ ಹುಡುಕಾಟದಲ್ಲಿದೆ. ಮಧ್ಯವಯಸ್ಸಿನ ತಲ್ಲಣ ಅಂದರೆ ಇದುವೇ..
ಎಲ್ಲ ರೀತಿಯಲ್ಲೂ ಡೀಸೆಂಟ್ ಆಗಿದ್ದ ವ್ಯಕ್ತಿ ಆತ. ಆದರೂ ಇದ್ದಕ್ಕಿದ್ದ ಹಾಗೆ ಅದೇಕೋ ಆಫೀಸ್‌ನಲ್ಲಿ ಇರೋ ಇಪ್ಪತ್ತು ಚಿಲ್ರೆ ವಯಸ್ಸಿನ ಹುಡುಗಿಯರ ಜೊತೆ ಕಾರಣವಿಲ್ಲದೇ ಮಾತಾಡುತ್ತಿರಬೇಕೆಂಬ ಚಪಲ. ಹೆಣ್ಣುಮಕ್ಕಳಿಗೆಲ್ಲ ಏನೋ ಸಹಾಯ ಮಾಡಿ ಒಳ್ಳೆಯವನು ಅನಿಸಿಕೊಳ್ಳುವ ಹಂಬಲ. ಸಹೋದ್ಯೋಗಿಗಳಿಗೆಲ್ಲ ‘ಈ ಮನುಷ್ಯನಿಗೆ ಈಗ್ಯಾಕಪ್ಪಾ ಹೀಗಾಯ್ತು?’ ಅಂತ ಕುತೂಹಲ. ಒಳಗೊಳಗೇ ಅವರ ಬಗ್ಗೆ ಹರಡಿಕೊಳ್ಳುವ ಕುಹಕ ನಗು…
ದಿನವೂ ಬಸ್ಸಿಗೆ ಹತ್ತುವ ಆಕೆಯದು ಇನ್ನೊಂದು ಟೈಪು. ವಯಸ್ಸು ಐವತ್ತು. ಆದರೂ ಇಪ್ಪತ್ತರ ಹುಡುಗಿಯರು ಹಾಕೋ ಡ್ರೆಸ್ಸು. ಗಾಢ ಲಿಪ್‌ಸ್ಟಿಕ್ಕು, ಹೈಹೀಲ್ಡ್ ಚಪ್ಪಲ್ಲು, ನೆರಳಲ್ಲಿಯೂ ಕಣ್ಣಿಗೆ ಗಾಗಲ್ಸ್… ವಯಸ್ಸು ಕಡಿಮೆ ಕಾಣಲಿ ಅನ್ನೋ ತವಕವಾ? ಬಸ್ಸಿನಲ್ಲಿಯೋ ಆಫೀಸಿನಲ್ಲಿಯೋ ಎಲ್ಲರನ್ನೂ ತನ್ನೆಡೆಗೆ ಸೆಳೆಯುವ ಬಯಕೆಯಾ? ಆಕೆಗೇ ಗೊತ್ತು..
ಪ್ರಾಯ ನಲುವತ್ತು ದಾಟಿತೋ, ಹೀಗೊಂದು ಬದಲಾವಣೆ ಕೆಲವರ ಮನವನ್ನಾದರೂ ಹೊಗುವುದುಂಟು. ಬದುಕಿನ ಗತಿಯನ್ನೇ ಅಲುಗಾಡಿಸಬಲ್ಲ ಸ್ಥಿತ್ಯಂತರವೇ ಇದಕ್ಕೆ ಕಾರಣವಾಗಿರಬಹುದು. ಏನೂ ಇಲ್ಲದ ನಿಂತ ನೀರಿನ ಸ್ಥಿತಿಯೂ ಇರಬಹುದು. ಯಾವ ಕಾರಣವೂ ಇಲ್ಲದೆ ಇರಬಹುದು. ನೆಪ ಇರಲಿ, ಇಲ್ಲದಿರಲಿ ಮಧ್ಯವಯಸ್ಕರನ್ನು ಕಾಡುವ ಈ ಏರುಪೇರುಗಳಿಗೆ ಮನಃಶಾಸ್ತ್ರೀಯವಾಗಿ ‘ಮಿಡ್‌ಲೈಫ್ ಕ್ರೈಸಿಸ್’ ಎಂಬ ಹೆಸರಿದೆ. ಅಮೆರಿಕದಂತಹ ಪಾಶ್ಚಾತ್ಯ ದೇಶಗಳಲ್ಲಿ ಈ ತಲ್ಲಣ ಕಾಣುವುದು ಹೆಚ್ಚಾದರೂ ಬದಲಾದ ಭಾರತೀಯ ಜೀವನ ಶೈಲಿಗೋ ಏನೋ ಇಲ್ಲಿಯೂ ಇದು ಕಾಣಿಸಿಕೊಳ್ಳುತ್ತಿರುವುದು ಸುಳ್ಳಲ್ಲ.
ಬೋರೋ ಬೋರು
ಸಾಮಾನ್ಯವಾಗಿ ೪೦ರಿಂದ ೬೫ ವರ್ಷ ವಯಸ್ಸಿನ ವ್ಯಕ್ತಿಗಳಲ್ಲಿ ಕಂಡು ಬರೋ ಸಮಸ್ಯೆ ಇದು. ಫಲವತ್ತಾದ ಬದುಕೋ ಅಥವಾ ನೀರಸವೋ, ೪೦ ವರ್ಷಗಳ ಕಾಲ ಬಾಳಿಯಾಗಿರುತ್ತದೆ. ಅದೇಕೋ ಏನೋ, ಇದ್ದಕ್ಕಿದ್ದ ಹಾಗೆ ‘ಲೈಫು ಇಷ್ಟೇನಾ?’ ಅನ್ನಿಸಬಹುದು. ನಿತ್ಯವೂ ಅದೇ ಮನೆ, ಅದೇ ಸಂಸಾರ, ಅದೇ ತಾಪತ್ರಯಗಳು… ಓಹ್, ಇದು ಮುಗಿಯುವುದೇ ಇಲ್ಲವಾ ಅನ್ನಿಸಬಹುದು. ಮಕ್ಕಳೂ ಮನಸ್ಸಿಗೆ ಮುದ ಕೊಡುವ ಬಾಲಲೀಲೆಗಳನ್ನು ದಾಟಿ ಹದಿಹರೆಯದ ಸ್ವಪ್ನಲೋಕಕ್ಕೆ ಹೊಕ್ಕಿರುವಾಗ ಹೆತ್ತವರಿಗೆ ಕನಸಿನ ಬರ… ಆಫೀಸಿನಲ್ಲೂ ಅದೇ ಕೆಲಸ, ಅದೇ ಬಾಸು, ಅದೇ ಕಲೀಗ್ಸ್… ಊಹ್, ರೇಜಿಗೆ ಹುಟ್ಟಿಸದಿರುತ್ತದಾ? ದಿನಕ್ಕೆ ೧೬ ಗಂಟೆ ದುಡಿದ ಐಟಿ ವ್ಯಕ್ತಿಗಂತೂ ಮೈಮನಕ್ಕೆಲ್ಲ ಅದೇನೋ ಸುಸ್ತು ಆವರಿಸಬಹುದು. ವೃತ್ತಿಯಲ್ಲಿ ಮೇಲುಮೇಲಕ್ಕೇರುತ್ತಾ ಹೋಗಿ ಸ್ವಂತದ್ದೊಂದು ನರ್ಸಿಂಗ್ ಹೋಂ ಇಟ್ಟುಕೊಂಡು ಚೆನ್ನಾಗಿರುವ ವೈದ್ಯರಿಗೂ, ಬಿಸ್ನೆಸ್‌ನಲ್ಲಿ ಲಾಭವನ್ನುಂಡು ಸಂತೃಪ್ತಿಯ ತುರೀಯಾವಸ್ಥೆಗೆ ತಲುಪಿರುವ ವ್ಯವಹಾರಸ್ಥನಿಗೂ ಮುಂದೇನೆಂದು ಗೊತ್ತಾಗದೆ ಖಾಲಿ ಖಾಲಿ ಅನ್ನಿಸಬಹುದು. ಬೆಂಬತ್ತಲು ಹೊಸ ಗುರಿ ಏನೂ ಇಲ್ಲದೇ ಹೋಯಿತಾ?
ಹೆತ್ತವರ ಇಲ್ಲವಾಗುವಿಕೆಯಿಂದ ಒಳಗೊಳಗೇ ತಬ್ಬಲಿತನವೂ ಕಾಡಬಹುದು. ಓದು, ಉದ್ಯೋಗ, ಸ್ವಂತ ಸಂಸಾರ ಅನ್ನುತ್ತ ಮಕ್ಕಳೆಲ್ಲಾ ದೂರಾದರೆ ಎಲ್ಲವೂ ಬಿಕೋ ಅನ್ನಿಸುವ ‘ಎಂಪ್ಟಿ ನೆಸ್ಟ್ ಸಿಂಡ್ರೋಮ್’ ಮನಸ್ಸನ್ನೇ ಬಗೆಯಬಹುದು. ತನಗಿಷ್ಟು ಪ್ರಾಯವಾದರೂ ತಾನು ಇನ್ನೂ ಏನನ್ನೂ ಸಾಸಿಲ್ಲವಲ್ಲಾ ಎಂಬ ತಳಮಳ ಶುರುವಾಗಿ ಏನೋ ಹೊಸತು ಮಾಡಬೇಕೆನ್ನಿಸಬಹುದು. ಯಾಕೋ ತನ್ನ ಜೀವನ, ಬದುಕಿನ ರೀತಿ ಯಾವುದೂ ಸರಿಯಿಲ್ಲ ಎಂಬ ಅಸಮಾಧಾನ ಮೊಳಕೆಯೊಡೆಯಬಹುದು. ಇಂಥದ್ದರಲ್ಲಿ ಯಾವುದಾದರೊಂದು ಅನಿಸಿಕೆ ಕಾಡುವುದಕ್ಕೆ ಶುರುವಾಯಿತಾ, ಆ ವ್ಯಕ್ತಿ ಅದನ್ನು ಮೀರಲು ವಿಚಿತ್ರ ಪ್ರಯತ್ನಗಳನ್ನೂ ಮಾಡಬಹುದು. ಸುತ್ತಲಿನವರೆಲ್ಲ ಬಿಟ್ಟ ಕಣ್ಣುಗಳಿಂದ ನೋಡುವಂತಾಗುವುದೂ ಹೀಗಾದಾಗಲೇ..
ಗಂಡಸ್ರಿಗೊಂಥರಾ…
‘ಇದು ವಯೋಸಂಬಂ ಸಮಸ್ಯೆಯಾದರೂ ಹಾರ್ಮೋನ್‌ನಿಂದ ಉಂಟಾಗುವ ಸಮಸ್ಯೆಯೇನೂ ಇಲ್ಲಿ ಕಾಣುವುದಿಲ್ಲ. ತನ್ನ ವಯಸ್ಸಿನಿಂದಾಗಿ ಇನ್‌ಫೀರಿಯಾರಿಟಿ ಕಾಂಪ್ಲೆಕ್ಸ್‌ನಿಂದ ಬಳಲುತ್ತಿರುವವರು ಇದ್ದಕ್ಕಿದ್ದಂತೆ ಸುಪೀರಿಯರ್ ರೀತಿಯಲ್ಲಿ ಬಿಹೇವ್ ಮಾಡಬಹುದು. ಗಂಡುಮಕ್ಕಳ ಆಂಡ್ರೋಪಾಸ್, ಹೆಣ್ಣುಮಕ್ಕಳ ಮೆನೋಪಾಸ್ ಸಮಸ್ಯೆಗಳನ್ನೂ ಇದರಲ್ಲಿ ಸೇರಿಸುವುದುಂಟು’ ಅಂತಾರೆ ಮನೋವೈದ್ಯ ಡಾ. ಪಿ.ವಿ.ಭಂಡಾರಿ.
೪೦-೪೫ರ ವೇಳೆಗೆ ಹೆಣ್ಣುಮಕ್ಕಳು ಮೆನೋಪಾಸ್‌ನಿಂದ ಬಳಲುವುದು ನಮಗೆಲ್ಲ ಗೊತ್ತು. ಮುಟ್ಟು ನಿಲ್ಲುವ ಈ ಹೊತ್ತು ಆಕೆಯನ್ನು ಕಾಡುವ ಅಭದ್ರತೆ, ಒಂದು ಸುಕ್ಕು ಮುಖದಲ್ಲಿ ಕಾಣಿಸಿದರೂ ಆಗುವ ಖಿನ್ನತೆ ಅವಳಿಗೆ ಮಾತ್ರ ಗೊತ್ತು. ವಿಶೇಷವೆಂದರೆ ಇದೇ ಹೊತ್ತಿನಲ್ಲಿ ಪುರುಷರಲ್ಲಿಯೂ ಮೇಲ್ ಮೆನೋಪಾಸ್ ಅಥವಾ ‘ಆಂಡ್ರೋಪಾಸ್’ ಕಾಣಿಸಿಕೊಳ್ಳುತ್ತದೆ. ಸ್ತ್ರೀಯರಲ್ಲಾಗುವಂತೆ ಸಂತಾನೋತ್ಪತ್ತಿಯ ಸಾಧ್ಯತೆಗಳು ಇಲ್ಲಿ ಒಮ್ಮೆಲೇ ಸ್ಥಗಿತಗೊಳ್ಳುವುದಿಲ್ಲವಾದರೂ ‘ಟೆಸ್ಟಿಸ್ಟಿರೋನ್’ ಹಾರ್ಮೋನ್ ಉತ್ಪಾದನೆ ನಿಧಾನವಾಗಿ ಕಡಿಮೆಯಾಗುವುದರಿಂದ ತನ್ನ ಶಕ್ತಿಯೂ ಕುಂದುತ್ತಿರುವಂತೆ ಪುರುಷರಿಗೆ ಅನಿಸುವುದುಂಟು. ಈ ಹಂತದಲ್ಲೇ ಎಲ್ಲೋ ಮುದುಕನಾದೆನಾ ಅಂತಂದುಕೊಳ್ಳುತ್ತಲೇ ತನ್ನ ಬೊಕ್ಕವಾಗುತ್ತಿರುವ ತಲೆಯನ್ನು ಮರೆಮಾಚುವ ಪ್ರಯತ್ನ ಮಾಡುತ್ತಾರವರು. ಬಿಳಿಗೂದಲನ್ನು ಕಪ್ಪು ಮಾಡಿಕೊಳ್ಳುತ್ತಾರೆ. ತನ್ನ ಸಂಗಾತಿಯ ಸಂತಾನೋತ್ಪತ್ತಿಯ ಸಾಧ್ಯತೆ ಕಡಿಮೆಯಾಯೆತೆನ್ನುವಾಗ ತನ್ನ ಈ ಅವಕಾಶ ಹೆಚ್ಚುಳ್ಳ ಎಳೆಯ ವಯಸ್ಸಿನ ಸ್ತ್ರೀಯರತ್ತ ಮನಸ್ಸು ಆಸಕ್ತವಾಗುತ್ತದಂತೆ. ಅದಕ್ಕೇ ಮಗಳ ವಯಸ್ಸಿನ ಹುಡುಗಿಯ ಜೊತೆ ಅಫೇರ್ ಇಟ್ಟುಕೊಳ್ಳಬೇಕೆನ್ನಿಸುವುದು. ಮಹಿಳೆಯರೂ ತಮ್ಮಿಂದ ಕಿರಿಯ ವಯಸ್ಸಿನ ಪುರುಷನ ಜೊತೆ ಸಂಬಂಧ ಹೊಂದಬಹುದು. ಸ್ತ್ರೀ-ಪುರುಷರಲ್ಲಿ ಸಮಾನವಾಗಿಯೇ ವಿವಾಹೇತರ ಸಂಬಂಧಗಳು ಕಾಣಿಸಿಕೊಳ್ಳಬಹುದು ಎನ್ನುತ್ತಾರೆ ಮನಃಶಾಸ್ತ್ರಜ್ಞರು.
ಹೊರ ಬರೋದು ಹೇಗೆ?
ಇದೊಂದು ಮಹಾ ಬಿಕ್ಕಟ್ಟೇನಲ್ಲ. ಆದರೆ ತಳಮಳಿಸುವ ಜೀವಕ್ಕೆ ಈ ತೊಂದರೆ ದೊಡ್ಡದೇ. ಆದರೆ ಈ ಸಮಸ್ಯೆಯನ್ನೇ ಬೃಹತ್ತಾಗಿಸಿಕೊಂಡು ಖಿನ್ನತೆಯ ಆಳಕ್ಕೆ ತಮ್ಮನ್ನು ತಾವು ತಳ್ಳಿಕೊಳ್ಳುವುದು ಮಾತ್ರ ತರವಲ್ಲ. ಯಾಕೋ ಬೋರಾಯ್ತು ಅನ್ನುತ್ತಾ ಏನೂ ತೊಂದರೆ ಇಲ್ಲದ ಕೆಲಸವನ್ನು ಬಿಟ್ಟು ಎದ್ದು ಬರುವುದೂ ಮೂರ್ಖತನವೇ. ತಿಳಿಯಾಗಿರುವ ಸಂಸಾರದ ನೆಮ್ಮದಿಯನ್ನು ಕದಡುವುದೂ ಸಲ್ಲ.
ಕೆಲವರು ಬದುಕಿನಲ್ಲಿ ಏಕತಾನತೆ ಕಂಡುಬಂತು ಅಂದಾಕ್ಷಣ ಹೊಸ ಹೊಸ ಕೆಲಸಗಳಿಗೆ ಕೈಹಾಕುವುದೋ ಅಥವಾ ಮರೆತುಹೋದ ಹಳೆಯ ಹವ್ಯಾಸವನ್ನು ಮತ್ತೆ ನೆನಪಿಸಿಕೊಂಡು ಅತ್ತ ಹೊರಡುವುದೋ ಹೀಗೆ ಏನಾದರೊಂದು ಮಾಡುತ್ತಾರೆ. ಬಿಕ್ಕಟ್ಟು ಕಾಡುತ್ತಿರುವುದು ಸ್ಪಷ್ಟವಾದರೆ ಅದರ ಕಾರಣ ತಿಳಿದುಕೊಂಡು ಅದನ್ನು ಪರಿಹರಿಸುವುದು ವಿವೇಕಯುತ ಮಾರ್ಗ. ಕೌಟುಂಬಿಕ ಸಂಬಂಧದ ಎಳೆಗಳನ್ನು ಇನ್ನಷ್ಟು ಗಟ್ಟಿಗೊಳಿಸಿದರೆ ಭಾವನಾತ್ಮಕ ಭದ್ರತೆ ಸಿಗುವುದಂತೂ ಖಚಿತ. ಏಕಾಂಗಿತನವನ್ನು ದೂರಾಗಿಸುವ ಮಾರ್ಗಗಳಂತೂ ಹಲವು ಇವೆ.
ಬದುಕಿನಲ್ಲಿ ಬಣ್ಣವಿಲ್ಲ ಅನಿಸಿದಾಗ ಮೂಡುವ ಭಾವ ಈ ಕ್ರೈಸಿಸ್. ರಂಗಿಲ್ಲದೆ ಬರಡಾಗುವ ಬದುಕಿಗೆ ಹೊಸ ಬಣ್ಣ ಹಚ್ಚಬೇಕಾದವರು ನಾವೇ. ಅದು ಢಾಳಾಗಿ ಅಸಹಜವೆನಿಸದಂತೆ ಎಚ್ಚರವಹಿಸಬೇಕಾದವರೂ ನಾವೇ.
ಹದಿಹರೆಯ, ಅಡಲ್ಟ್‌ಹುಡ್, ಮುದಿತನಗಳಂತೆ ಮಿಡ್‌ಲೈಫ್ ಹಂತ ಕೂಡ ಒಂದು ಸ್ಥಿತ್ಯಂತರದ ಹಂತ. ಇದಕ್ಕೆ ಯಾವುದೋ ಹಾರ್ಮೋನ್ ಏರುಪೇರು ಕಾರಣವಲ್ಲ. ವಯಸ್ಸಿನ ಕಾರಣದಿಂದ ಕೆಲವೊಮ್ಮೆ ವ್ಯಕ್ತಿಯಲ್ಲಿ ಕಾಣಿಸಿಕೊಳ್ಳುವ ಬದಲಾವಣೆ ಇದು. ಹೆಣ್ಣುಮಕ್ಕಳು ಇನ್ನಷ್ಟು ಸಣ್ಣ ವಯಸ್ಸಿನವರಾಗಿ ಕಾಣಿಸಿಕೊಳ್ಳಲು ಪ್ರಯತ್ನಿಸಬಹುದು, ಸಾಮಾಜಿಕವಾಗಿ ಹೆಚ್ಚು ತೊಡಗಿಸಿಕೊಳ್ಳಲೂ ಇಷ್ಟಪಡಬಹುದು. ಅದೇ ರೀತಿ ಪುರುಷರೂ ತಮ್ಮ ಮ್ಯಾನ್ಲಿ ಗುಣಗಳನ್ನು ಆಕ್ರಮಣಕಾರಿಯಾಗಿ ತೋರಿಸಿಕೊಳ್ಳಲು ಇಷ್ಟಪಡಬಹುದು.
ಪುರುಷರಿಗೆ ಇಂತಹ ಸಮಸ್ಯೆಗಳು, ಏಕತಾನತೆ ಕಾಡಿದಾಗ ಬೇರೆಡೆ ಗಮನ ಹರಿಸಲು ಕುಡಿತದಂತಹ ಮಾರ್ಗಗಳಿವೆ. ಆದರೆ ಸ್ತ್ರೀಯರಿಗೆ ಇಂತಹ ಪರ್ಯಾಯಗಳಿಲ್ಲ. ಅಂಥವರನ್ನು ಇದು ಹೆಚ್ಚು ಕಾಡಬಹುದು. ನಿತ್ಯವೂ ಒತ್ತಡದಲ್ಲಿ ಬದುಕುವವರಿಗೆ ಈ ಕ್ರೈಸಿಸ್ ಹೆಚ್ಚಾಗಿ ಎದುರಾಗಬಹುದು. ಕಾಡುತ್ತಿರುವ ಸಮಸ್ಯೆ, ಅದರ ಕಾರಣವನ್ನು ಗುರುತಿಸಿದರೆ ಅದಕ್ಕೆ ಪರಿಹಾರ ಮಾರ್ಗಗಳನ್ನು ಕಂಡುಕೊಳ್ಳುವುದೂ ಕಷ್ಟವೇನಲ್ಲ.
-ಡಾ| ಪಿ.ವಿ.ಭಂಡಾರಿ, ಮನೋವೈದ್ಯರು,
ಮಿಡ್‌ಲೈಫ್ ಕ್ರೈಸಿಸ್ ಅನ್ನುವ ಪದವನ್ನು ಮೊದಲ ಬಾರಿಗೆ ಬಳಸಿದ್ದು ಎಲಿಯಟ್ ಜಾಕ್ವೆಸ್ ಎಂಬ ಕೆನಡಿಯನ್ ಮನಃಶಾಸ್ತ್ರಜ್ಞ. ೧೯೬೫ರಲ್ಲಿ ಪಾಶ್ಚಾತ್ಯ ಜೀವನರೀತಿಯನ್ನು ವಿಶ್ಲೇಷಿಸುವ ವೇಳೆ ಆತ ಬಳಸಿದ ಶಬ್ದ ಇದು. ಸಿಗ್ಮಂಡ್ ಫ್ರಾಯ್ಡ್ ಕೂಡ ಮಧ್ಯವಯಸ್ಸಿನಲ್ಲಿ ಎಲ್ಲರ ಮನಸ್ಸನ್ನೂ ಸಾವಿನ ಭಯ ಸೆಳೆಯುತ್ತದೆ ಎಂದಿದ್ದ.
ಎರಿಕ್ ಎರಿಕ್‌ಸನ್ ಎಂಬ ಮನಃಶಾಸ್ತ್ರಜ್ಞ ಮನೋವೈಜ್ಞಾನಿಕ ರೀತಿಯ ಲೈಫ್ ಸೈಕಲ್ ವಿಂಗಡಣೆಯ ವೇಳೆ ಈ ಪರಿಕಲ್ಪನೆಯನ್ನು ಸ್ಥೂಲವಾಗಿ ಹೇಳಿದ್ದ. ಆತನ ಪ್ರಕಾರ, ಬದುಕಿನ ಏಳನೇ ಹಂತದಲ್ಲಿ ಜನರು ತಮ್ಮ ಜೀವನ, ತಮ್ಮ ಬದುಕಿನ ಉದ್ದೇಶ ಇತ್ಯಾದಿಗಳಿಗೆ ಹೊಸ ಅರ್ಥವನ್ನು ಕಂಡುಕೊಳ್ಳಲು ಪ್ರಯತ್ನಿಸುತ್ತಾರೆ. ಇದುವರೆಗೂ ತಾನು ಏನೂ ಸಾಸಿಲ್ಲ ಎಂಬರ್ಥದ ಅತೃಪ್ತಿಗಳು ವ್ಯಕ್ತಿಯನ್ನು ಕಾಡತೊಡಗಿ ಇದ್ದಕ್ಕಿದ್ದಂತೆ ತನ್ನ ಬದುಕಿಗೆ ಒಂದು ಹೊಸ ಅರ್ಥವನ್ನು ತುಂಬಿಕೊಳ್ಳುವ ಪ್ರಯತ್ನವೆಂಬಂತೆ ಹೊಸದಾದ ಯಾವುದೋ ಚಟುವಟಿಕೆಯಲ್ಲಿ ತೊಡಗಿಕೊಳ್ಳುತ್ತಾರೆ. ಕಾರ್ಲ್ ಜಂಗ್ ಎಂಬ ಮನಃಶಾಸ್ತ್ರಜ್ಞ ಈ ಪರಿಕಲ್ಪನೆಯನ್ನು ವಿವರಿಸುವುದಕ್ಕೆ ಪ್ರಯತ್ನಿಸಿದ. ೪೦ರಿಂದ ೬೦ರ ವಯಸ್ಸಿನ ವ್ಯಕ್ತಿಗಳಲ್ಲಿ ಉಂಟಾಗುವ ಭಾವನಾತ್ಮಕ ಬದಲಾವಣೆಯೇ ‘ಮಿಡ್‌ಲೈಫ್ ಕ್ರೈಸಿಸ್’ ಎಂದು ಆತ ವ್ಯಾಖ್ಯಾನಿಸಿದ. ವ್ಯಕ್ತಿತ್ವದ ಮಾಗುವಿಕೆಯ ಹಂತಗಳಲ್ಲಿ ಇದೂ ಒಂದು ಎಂದು ಆತ ಹೇಳಿದ.
ಮುಗಿಲಹಕ್ಕಿ 